يوميات..شيخوه ومطيره....بقلم أم ميره^_^

[almeem]

حيّ ومرحبا بقدم لكم اليوم يوميات مطيره وشيخه وهن حريم كبار

من خلال هاليوميات بنتعرف ع الاخطاء اللى تصير في رمضان خاصه من صوب الحريم

اتمنى تستفيدوا ......



الحلقه الاولى : اسواق هدايا صور



مطيره :....يالله رحمتك ....يالله ابا اتصل بشيخوووه اشوفها اليوم ما ياتني نبا نمشي الصلاه غايته ... لين نحجز مكان

(ترفع السماعه ترررن تررررن ) الوووووه

فطوم : الووووه هلا خالتى مطيره شخبارج ؟؟

مطيرة : بخير وعافيه شخبارج بنتي فطوم

فطوم : الحمد لله دام انتي بخير

مطيره : فطوم هين امج اشوفها توانت (بمعنى تاخرت ) عليه

فطوم : هاااه خالتى امي ما قالت لج

مطيره : لا والله ما قالت لي ...خير ان شاء الله هيش مستوى

فطوم : مشي خالتى بس امي ماشه اذيه المحل اليديد اسواق هدايا صور

مطيره : سلط الله على بليسها ....المحل ابدى من صلاتها ...يالله مابا ادعي عليها استغفر الله العظيم ...وراه السوق بيطير

فطوم : ( متوهقه وما تعرف هيش تقول ) اممممممم والله ما عرف قلنالها بعد الصلاه بنمشي ....

مطيره : لا اله الا الله ....انزين بنتي صكي بعدين شغلها امج عندي يالله بلحق ع الصلاه مع السلامه

فطوم : وداعة الله



اليوم الثاني ضحي تلاجن في بيت شيخووووه

شيخوووه : هلا قربي مطيروووه

مطيره : السلام عليكم

شيخوووه : حيّ ومرحبا وعليكم السلامه جربي

مطيره : يالله ....اخر ما فينا ركب ....

شيخووووه : نوبه الكبر شين ....

مطيره : اسميه ....( وتشوف عليها بنظرة اتهام ..) اقول شيخووووه

شيخوووه : قولي

مطيره : هينج ابارحه عن الصلاة حرستج

شيخووووه : تراه هالسمه مشيت طشه الدكان اليديد ....لكان اقولج امه محمد كلها هناك لا متعجب عماني ولا هندي جيه كانه الهبطه سلامتج ....وخلونا نصطن شيءً من بعد الفطور لين ما خلصت صلاة التروايح نحرس الوالي يفتح الدكان

مطيره : وفوتي عليج الصلاة بسبة الدكان اليديد

شيخوووه : تراه قلت بتشوف عن افادي

مطيره : امي الدنيا ما تركب جيه نوبه ...تودرى صلاة على دكان وتعرفي حن في رمضان وعاد الحسنات اتكدس في رمضان ....اماه الاه يبوا يلهوج عن صلاتج ولا هيش معناه يفتوحه وقت الصلاه

شيخوه : اسميه ياختى مطيره ... بس هيييي اليوم بمشي عندج الصلاة

مطيره : غصبا عنج تعرفيني ما عندي ربيعه غيرج وكاان ع السوق بخلي سالوم يشلنا سوق البناين بعد الصلاه



انتهي .......

ام ميره

 

[almeem]

طبعا أم ميره..صديقتي الغاليه بنت صور العفيه.....تمجيدا لقلمها وفكرها..

 

[شيخة الـزين]

يسين يسين على ميطروه وشيخوه هههههههه

،،،فكرة حلوه الصراااحة ،،ابدعتي الميم ^^

^^ونتظر الحلقات اليديده أكيييد

 

[almeem]

أووب..الزين..آني آني آني ....مالي في الروايه

لا سرد ولا كتابه...



...

هسه أنا أشكرج هوايه...



...



أنوه الكاتبه...أم ميره...مش أم عزوز*^

 

[لحن الزهور]

ووووايد نايس ....

 

[almeem]

السلام عليكم

اليوم قصتنا شوية غير ما تخص الحريم ...تخص الشارع العام

الحلقة الثانية : حسنات بالنهار و.....بالليل



بعد صلاة التروايح مطيره وشيخه طالعات من المسيد يمشن برويلهن



شيخوووه : الله يهديج مطيروووه ما لجيتي غير اليوم نمشي بريولنا....اليوم وايد طول الشيخ في الصلاة

مطيره : حركي ريلوج طشه بيسيرى الدم في عظامج



وتخطف عليهن سيارة ومشغل أغاني مطول الله فووووول



مطيره : حسبي الله ونعم الوكيل ....اوووه شيخوووه الااه الاوادم ما يردهم رمضان وغير رمضان ...استغفر الله العلى العظيم

شيخوووه: سلط الله على بليسه اووووه جيه شارخ مسجل



ولفة السياره مره ثانيه وتوقف شيخه وسط الشارع



مطيره : شيخوووه هيش تسوى فضحتني

شيخوووه : صبري عليه اذيه جليل الادب اني بأدبه



الولد ضرب ويل



راشد : ( بعصبية ) اوووه خالتي ما تشوف سياره تبيني ادعمج

شيخووه : كان تستانس ادعم بتشوفك ...جليل الادب

راشد : ( معصب ) خالتى زحفي عن الشارع

شيخووه : ( تمشي صوب دريشة السيارة ) اقولك انته ما تستحي جيه شارخ مسجل الاوادم رمضان

راشد : اوووه خالتي خلص الصوم ترانا فطرنا

شيخووه : يا ابويه الدنيا ما تركب جية .... ما تعرف الاغاني حرام وخاصه في هالشهر ...وهيش اذيه الصوم اللى تصومووه

راشد : ( يسمعها وهو متملل وفي خاطره خلصي بسرعة ...وببتسامه صفراء ) أن ششاء الله خالتى ع امرج

مطيره : شيخوووه وراج ماسكه ولد الاوادم خلا

راشد : خالتى ربيعتج تتهمج

شيخووه : ( بعصيبه ) اسمعها بس انت سمعت كلامي

راشد : ( بتوتر ) اها اها خالتي سمعت يزاك الله خير

شيخوووه : هي اخطف من جدامي وخليني اشوفك مشغل مسجل وشارخ عليه في الحاره



انتهى



بعضهم يعتقد أن رمضان ... صوم عن الاكل فقط ...صوم في النهار فقط

رمضان ياتي مره في السنة وتغفر فيه الذنوب وتفتح ابواب الجنة ....اغتنموا الفرصة ....لعلكم لا تدركون رمضان القادم



دعوتكم ام ميره

 

[صور وراء البحار]

هههههههههههههههههههههههه



ضحكتيني بنت الحلال ومن الضحك اللي عندنا قاموا م الرقاد



اذيه شيخوه يبالها درس يكون ما ادعي على خلق الله





عجبني السرد والفكرة والهدف من المواقف

فيه اخطاء وايد تصير ف رمضان

خليها تكتب عن الشعب اللي يجلب الليل نهار والنهار ليل .... طول الصبح رقود لا صلاه ولا عباده!



تسلم أم ميرة وشكريها باسم المنتدى على مشاركتها



جزاكن الله خير



عندي فكره حلو لو تطرشنها ف الوتساب تنتشر اسرع وتصل للاغلب

 

[ملاك الخير]

كتابه حلوة تسلم ام ميره وتسلمين almeem ع الكتابة



بانتظار الجديد​

 

[almeem]

هههههههههههههههههههههههه



ضحكتيني بنت الحلال ومن الضحك اللي عندنا قاموا م الرقاد



اذيه شيخوه يبالها درس يكون ما ادعي على خلق الله





عجبني السرد والفكرة والهدف من المواقف

فيه اخطاء وايد تصير ف رمضان

خليها تكتب عن الشعب اللي يجلب الليل نهار والنهار ليل .... طول الصبح رقود لا صلاه ولا عباده!



تسلم أم ميرة وشكريها باسم المنتدى على مشاركتها



جزاكن الله خير



عندي فكره حلو لو تطرشنها ف الوتساب تنتشر اسرع وتصل للاغلب

^_^





وتعجبج مطيروه بعد...





مايحتاي ترا انا من هين يبت هالخروفه غير من الواتساب ماقصرت الصاحبه..





الشكر واصل غاليتي..أشكر خطواتج هنيه^^

 

[almeem]

كتابه حلوة تسلم ام ميره وتسلمين almeem ع الكتابة



بانتظار الجديد​

مب كتابه بل copy & pste>>







أشكر حضورج يامبدعه..أقول كتبي الميم بعربيتها احلا عن almeem أشوفها من طقطقة أصابعج أحلا^_^

 

[almeem]

الحلقة الثالثة : (فَمَن كَانَ مِنكُم مَّرِيضًا أَوْ عَلَى سَفَرٍ فَعِدَّةٌ مِّنْ أَيَّامٍ أُخَرَ...)



قبل السحور بنص ساعة



شيخه : فطووووم ....يا فطوم ....لا آله الا الله ....اذيه هين غاصت ...احمدوووه ...اووووه احمدوووه ...كح كح كح ...حسبي الله عليها من كحه ( مشيت لين المطبخ ...) فطوم اقولج انتي ما تسمعيني واني الهمج

فطوم : لا اماه ما سمعتج ...خير

شيخه : ما شفتي فكس

فطوم : احيده في مكتبه ....وراج اماه ريولج تعورج ولا شي

شيخه : لا طشه كحه يايتني وابا امرخ بفكس ....

فطوم : انتي روحي الحجره بروحي بييجج....



اليوم الثاني ....زادت حالة شيخوووه وياتها حمى وعلى الفراش

أحمد : ( قاعد على راسها ) اماه خلا العياده

شيخه : هيشووووه عياده واني صايمه وبعدين بيفطروني حشي ما تحركت من مكاني

احمد : اووووه اماه ما يستوى كحه وحمي وانتي راعية سكر وضغط

شيخه : ما عليه بس ....



وتدخل عليهم مطيره ......وسلمت

احمد : خالتي كلامي امي ابشلها العياده ما تبا جيه تتنافض من الحمى

مطيره : ابويه اذيه في مكيف المسيد كانت مجابلتنه ....شيخوووووه قومي طشي العياده

شيخه : حشى يا ام سالم ما تحركت

مطيره : وابويه اصريه المرض لعبه ...قاعده جيه معانده

شيخه : ياختى صايمه بيفطروني فالعياده

مطيره : لازم تراج مريضه ولا تبي تموتي دوج منها

شيخه : ( في خاطرها ...يالله ما تطرى شي خير ....)بخف تراها لكحه وطشة حمى

مطيره : واصريها الحمى والكحه سهله ...ياما ناس ما فيهم باس ع طشه حمى قالوا لج توفى اصريه الحين دنيا ...الله بسلامه بس .... وكان ع الصوم انتي معذوره ...وبتعوضيه بعد رمضان اذا ربي عطانا عمر

شيخه : ياماه ما عليه باس

مطيره : اشوفج ما ايبج الكلام ....فطوم يا فطوم

فطوم :هلا خالتي

مطيره : هاتي عباءة امج بنشلها العياده وتخف عنها عناد

انتهى ......

فعلا البعض يتحامل على مرضه من اجل الصيام ....وتجده غيور على فعل الطاعات ...

بس الانسان معذور بالنهاية دام دينا دين يسر (يُرِيدُ اللَّهُ بِكُمُ الْيُسْرَ وَلا يُرِيدُ بِكُمُ الْعُسْرَ)



دعواتكم ام ميره

 

[ملاك الخير]

أمس صار لنا نفس الموقف مع خالتي وما رضت تروح المستشفى عشان ما يفطروها !!



الله يهديها بس ويعطيها الصحة والعافية إن شاء الله



نتمنى من ضمن المحاضرات اللي تقام في رمضان انهم يوعوا الحريم على هذي النقطة !!​

 

[almeem]

تراهن كذأ امهاتنا الله يحفظهن ويهديهن..

ومن طحنا يحنن علينا الا تروحن تعالجن....

 

[almeem]

الحلقة الرابعة : الجيش وصل صور



قبل الفطور بساعه أو اقل من ساعه ، مطيره في المطبخ وتنادى بنتها مريم



مطيره : مريوم ....يا مريوم

مريم : (وطبعاً مريوم اتشوف التلفزيون ) هااااااه امااااه لحظه

مطيره : لا حوله ولا قوة الا بالله ...يا مريوووم ...مريوم



وبعد الفاصل الاعلاني ....في القناة .....مريوم مشت المطبخ لامها

مريووووم : هاه اماااااه

مطيره : مرويوووم .....هيش اذيه الفعله التلفزيون بيطير

مريوم : اماه اليوم الحلقه حماس ...يقولج الجيش وصل الجهره

مطيره : عساه يوصل هين ما يوصل ....الناس تعبانه وتجهز فطورها ....وانتي تقولوا لي الجيشش وصل هيشسمه ...الله يبعد عنا حروب وجيوش .....

مريوم : اماه تراه بعده الاذان

مطيره : وان شاء الله بنحرس مسلسلج عشان تزهبي الفطور ....اسميه فطرنا





بيت شيخووووه .......

قريب اذن مغرب وعلى مائدة الاكل ينظروا الاذان ....وعلى التلفزيون حاطين القناة الفلانية مطلعه مسلسل خليجي وفي ممثله لابسه لبس الله يستر وميكب اووووووفر

شيخه : يا ابويه يا احمد ....غير هالقناة ....ما يستوى اذيه الامر ....الحين اذيه وحده الناس يتشوفوا عليها

احمد : اماه صبري ....الحين بيجتلها ريلها

شيخه : حسبي الله ونعم الوكيل ....هيش اذيه الصوم اللى تصوموه ....غير حط عمان يحطوا الحين قران ....وقت صوم ومغاريب وانتوا اتشوفوا الااه المفصخات .....استغفر الله العلى العظيم



بعد صلاة التروايح مطيره وشيخوه جالسات يتقهون ....ويسولفن

مطيره : يا اماه يا شيخوووووه ...الناس صارت تصوم صوم بطون ....و العين والقلب واذنهم ابد ما تصوم

سيخووووه : تراه يقولوا صوم بطون ولا صوم اليوارح ....ياختى يرحم زمان اول حتى المسلسلات غير تاريخيه محتشمات ...عارفين شهر فضيل اما الحين خذوه فغلوه

مطيره : اسميه ياختى والمشكله لو منعتيهم عن التلفزيون من البيت ....بيتشوفوه برع ما يردهم شي ....بس الواحد هيش يقول غير حسبي الله ونعم الوكيل .....

انتهى ....



قالتها شيخه صوم بطون ولا صوم الجوراح ...جيه صار رمضانا ....

وين الاعتكاف في المساجد ...وين حلقات الذكر ....وين المتسابقون في حفظ القرآن ....سبحان الله ...صار اللعب واللهو في رمضان زايد



أسال الله العفو والتثبيت في الدين لي ولكم



دعواتكم ام ميره

 

[فكر المخينية]

شكرًا لكِ الميم .. مواقف مضحكة ولها حضور قوي في المجتمع​

​

​

تقديري ​